Í lok maí bárust þær ánægjulegu fréttir að vottunarnefnd iCert ehf hefði að lokinni úttekt staðfest að Menntaskólinn á Ísafirði starfræki gæðastjórnunarkerfi í samræmi við kröfur sem settar eru fram í staðlinum ÍST EN ISO 9001:2015 og nær til reksturs framhaldsskóla á verknáms- og bóknámsbrautum. Staðfestingin fékkst að loknu löngu undirbúinings- og vinnuferli, en það var í lok árs 2017 sem markmið um innleiðingu gæðakerfis og vottun var sett í stefnuskjal skólans. Stjórnendur þakka gæðaráði og öllu starfsfólki skólans fyrir þennan góða árangur.

Í Menntaskólanum á Ísafirði er áfanginn Umhverfis- og átthagafræði (UMÁT) kenndur á hverju ári. 

Hluti af UMÁT áfanganum á haustönn 2020 fjallaði um þjóðgarða og var ferlið við stofnun þjóðgarðsins á sunnanverðum Vestfjörðum skoðað. 

Í tengslum við efnið var unnið að tillögum að nafni á nýja þjóðgarðinn. Nemendur í áfanganum voru 50 talsins. 19 tillögur að nafni bárust frá nemendum og var síðan kosið í þremur hlutum út frá tillögum nemenda. Í lokin var kosið um sex efstu tillögurnar sem voru. 

Sigurtillaga UMÁT í MÍ var Vesturgarður með þeim rökstuðningi að það væri einfalt, lýsandi og grípandi. 

Sigurtillagan var send fyrir hönd nemenda í samkeppni Umhverfisstofnunar um nafn á þjóðgarðinn, ásamt hinum fimm efstu tillögunum. 

Samstarfshópur verkefnisins hjá Umhverfisstofnun hefur nú farið yfir tillögurnar og valið úr þeim fimm nöfn sem hópnum fannst koma best til greina og efnir nú til kosninga um nafnið. Er Vesturgarður ein af þeim tillögum sem nú er kosið um.

Tillögurnar sem hægt er að kjósa um nú á vef Umhverfisstofnunar eru eftirfarandi:

• Vesturgarður - einfalt nafn, lýsandi og grípandi.
• Þjóðgarðurinn Gláma -  nafnið myndi halda á lofti nafni jökuls sem er horfinn ásamt því að vísa til Glámuhálendis
• Dynjandisþjóðgarður  - vísar til fossins Dynjanda
• Arnargarður – vísar til stofns hafarna í þjóðgarðinum
• Vestfjarðaþjóðgarður

Við hvetjum alla til að kjósa um nafn á nýja þjóðgarðinn á sunnanverðum Vestfjörðum HÉR: Kosning um nafn á þjóðgarði

Laugardaginn 22. maí s.l. voru 76 nemendur brautskráðir frá skólanum við hátíðlega athöfn í Ísafjarðarkirkju. Vegna sóttvarnartakmarkana mátti takmarkaður fjöldi vera við athöfnina. Því voru einuningis útskriftarnemar, gestir þeirra og starfsfólk skólans viðstödd, en Viðburðarstofa Vestfjarða sá um beint streymi frá athöfninni. Útskriftarfagnaður sem hefð er fyrir að halda að kvöldi brautskráningardags með útskriftarnemum, fjölskyldum þeirra og afmælisárgöngum féll því miður niður annað árið í röð.

Nemendur voru brautskráðir af 15 námsbrautum. Tíu nemendur úr húsasmíði, 2 nemendur af lista-og nýsköpunarbraut, 7 nemendur af sjúkraliðabraut, 8 úr skipstjórnarnámi A, 4 úr skipstjórnarnámi B, 1 úr stálsmíði og 2 úr vélstjórnarnámi A. 4 nemendur útskrifuðust með diplómu í förðun. Alls útskrifuðust 47 nemendur með stúdentspróf og skiptust þannig eftir brautum: 4 af félagsvísindabraut, 5 nemendur af náttúruvísindabraut, 2 nemendur af náttúruvísindabraut - afreksíþróttasviði, 18 nemendur af opinni stúdentsbraut, 8 nemendur af opinni stúdentsbraut – afreksíþróttasviði, 3 nemendur af opinni stúdentsbraut með áherslu á háriðngreinar og 7 nemendur útskrifuðust með stúdentspróf af fagbraut.

Fjölmörg verðlaun voru afhent fyrir góðan námsárangur og að vanda setti tónlist flutt af útskriftarnemum stóran svip á athöfnina. Dux scholae 2021 er Karólína Mist Stefándóttir stúdent af náttúruvísindabraut með meðaleinkunnina 9,53. Semidux er Egill Fjölnisson stúdent af félagsvísindabraut með meðaleinkunnina 9,05.  Við óskum öllum útskriftarnemum innilega til hamingju með áfangann og óskum þeim gæfu og gengis í framtíðinni.

Á morgun, laugardaginn 22. maí kl. 13:00, fer fram brautskráning og skólaslit í Menntaskólanum á Ísafirði. Athöfnin fer fram í Ísafjarðarkirkju.

Brauskráðir verða 76 nemendur af 15 námsbrautum. Af útskriftarnemun eru 33 dagskólanemendur, 32 dreifnámsnemendur og 17 nemendur í fjarnámi.

10 nemendur útskrifast úr húsasmíði, 2 nemendur af lista-og nýsköpunarbraut, 7 nemendur af sjúkraliðabraut, 8 úr skipstjórnarnámi A, 4 úr skipstjórnarnámi B, 1 úr stálsmíði og 2 úr vélstjórnarnámi A. 4 nemendur útskrifast með diplómu í förðun. 47 nemendur útskrifast með stúdentspróf, 4 af félagsvísindabraut, 5 nemendur af náttúruvísindabraut, 2 nemendur af náttúruvísindabraut - afreksíþróttasviði, 18 nemendur af opinni stúdentsbraut, 8 nemendur af opinni stúdentsbraut – afreksíþróttasviði, 3 nemendur af opinni stúdentsbraut með áherslu á háriðngreinar og 8 nemendur útskrifast með stúdentspróf af fagbraut.

Vegna samkomutakmarkana eru eingöngu boðsgestir velkomnir í athöfnina. Hægt verður að hofa á athöfnina í beinu streymi frá Viðburðastofu Vestfjarða með því að smella hér

Þegar líða fer að lokum vorannar er einn af árvissum vorboðum þegar útskriftarefni kveðja skólann. Hér í MÍ bjóða útskriftarefni starfsfólki í veglega veislu sem beðið er eftir með mikilli eftirvæntingu. Útskriftarefni og starfsfólk eiga saman góða stund yfir veitingum sem að þessu sinni voru bornar fram í mötuneyti skólans, svo fylgt væri takmörkunum vegna sóttvarna. Daginn eftir taka útskriftarefni daginn snemma og fara um bæinn í skemmtilegum búningum, vekja starfsfólk og flesta aðra í leiðinn. Síðan mæta þeir i mötuneyti skólans í staðgóðan morgunverð áður en haldið er út í daginn í meira sprell. 

Starfsáætlun (skóladagatal) skólaársins 2021-2022 var tekin til afgreiðslu og samþykkt, á skólaráðsfundi þann 4. maí s.l. Áður höfðu drög að áætluninni verið kynnt kennurum á sviðsfundum og athugasemdir bárust ekki.

Skóladagatal 2021-2022

Sýningar á söngleiknum Hárinu hefjast að nýju í kvöld en vegna samkomutakmarkana þurfi að hætta sýningum í mars. Sýnt verður í Edinborgarhúsinu föstudag, laugardag og sunnudag. Sýningar hefjast kl. 20 og miðasala er á Leikfélag Menntaskólans á Ísafirði

Út er komin ný reglugerð um takmörkun á skólastarfi vegna farsóttar og gildir hún til 5. maí. Henni fylgir lítil breyting hvað skólahald varðar:

• Í stað 2 m fjarlægðartakmarkana má nú vera 1 m. Stólum og borðum í mötuneytinu hefur nú verið raðað í samræmi við það.
• Áfram þarf að vanda allar sóttvarnir, spritta sig þegar komið er inn á ný svæði og alls staðar er grímuskylda.
• Nemendur þurfa áfram að sótthreinsa borð og stóla eftir kennslustundir í samstarfi við kennara.

Nú eru aðeins 14 kennsludagar, fyrir utan 6 námsmatsdaga, eftir af önninni. Nú er bara að gefa í á lokametrunum, klára áfangana og halda sóttvarnirnar út. Við getum þetta!

Í dag var gefin út ný reglugerð um takmörkun á skólastarfi vegna farsóttar. Í henni felast ekki miklar breytingar fyrir okkur í MÍ. Við getum haft staðnám eftir páskafrí en tökum aftur upp grímuskyldu um allan skólann, líka í Gryfjunni.

Fyrirkomulagið í skólanum verður með eftirfarandi hætti, en frekari upplýsingar er að finna hér:

Fjarlægðartakmörk:

Í skólanum þurfa að vera 2 m á milli allra. Það er ekki raunhæft í skólastarfi og því verður grímuskylda í öllum skólanum, innan og utan kennslustofa.

Nauðsynlegt að spritta:

Þegar komið er inn í skólann eða inn á ný svæði þurfa allir að spritta sig. Allar kennslustofur þarf að sótthreinsa eftir hverja kennslustund.

Einstefna á sumum stöðum í skólanum:

Í stigum í bóknámshúsi er einstefna. Við förum upp hjá sjoppunni eða milli stofu 16 og 17. Við förum niður hjá kennarastofunni og stofu 8 eða milli stofu 3 og 4.

Veikindi/sóttkví/eingangrun:

Ef þú ert með flensulík einkenni vertu heima og farðu í sýnatöku. Nauðsynlegt er að láta vita af sóttkví eða einangrun á netfangið misa@misa.is

Mötuneyti:

Alla daga er mötuneytið opið frá kl. 12:20-13:20. Við hvetjum alla sem hafa tök á að mæta á fyrri hluta opnunartímans um að gera það, m.a. til að forðast raðir.

Heimavist:

Heimavistin verður opin og gestakomur leyfðar eins og segir til um í heimavistarreglum.

Vegna hertra sóttvarnaraðgerða sem tóku gildi á miðnætti þá hefur verið tekin sú ákvörðun að loka skólanum þessa tvo daga sem eftir eru fram að páskafríi. Nemendur og forráðafólk fengu sendar eftirfarandi upplýsingar í gær:

Engin kennsla verður í Menntaskólanum á Ísafirði fimmtudaginn 25. mars og föstudaginn 26. mars. Skiladagar verkefna þessa tvo daga gilda. Staðan varðandi skólahald verður tekin aftur að loknu páskafríi.

Vegna heimavistar: Nemendur á heimavist sem geta farið heim eru hvattir til að gera það sem allra fyrst. Heimavistinni verður formlega lokað frá og með miðnætti og það á við um mötuneytið líka.

Vegna leiksýningar: Í kvöld (24/3) verður sýning á Hárinu sem verður því miður lokasýning í bili.

Þessar hamlandi aðgerðir geta haft mismunandi áhrif á okkur og okkar líðan. Því er mikilvægt að við reynum að hugsa jákvætt og vel um okkur sjálf í páskafríinu. Fylgjum tilmælum Almannavarna og pössum upp á eigin sóttvarnir. Við höfum því miður verið í þessum sporum áður og enn og aftur þurfum að gera okkar besta í baráttunni við veiruna.

Gleðilega páska!